Mwanza. Katika maisha ya ndoa, kuna mambo mengi yanayochangia kuimarisha uhusiano kati ya wanandoa.
Miongoni mwa mambo hayo ni mawasiliano mazuri, kuheshimiana, kusameheana, na kushirikiana katika majukumu ya kila siku.
Hata hivyo, kuna jambo jingine linalochukuliwa kuwa dogo na lisilo la lazima na watu wengi, lakini lina nguvu kubwa ya kuimarisha mapenzi na kuleta furaha ya kweli katika ndoa.Jambo hilo ni zawadi.
Watu wengi wanapofikiria zawadi, hufikiri kuhusu vitu vya thamani kubwa kama magari, simu, au mapambo ya bei ghali. Lakini ukweli ni kwamba, zawadi inaweza kuwa kitu chochote, hata kile kidogo kama pipi, maua, au hata maneno madogo ya upendo. Lini umemtamkia mwenza wako maneno: Nakupenda?
Katika somo la saikolojia ya uhusiano, kuna kitu kinachoitwa “lugha tano za mapenzi” kilichoanzishwa na Dk Gary Chapman.
Mojawapo ya lugha hizo ni utoaji wa zawadi. Kwa watu wengi, kupokea zawadi, hata kama ni ndogo ni njia ya kuthibitishiwa kuwa wanapendwa, wanathaminiwa na wanazingatiwa. Wakati mwingine, zawadi ndogo kama maua au pipi inaweza kubeba ujumbe kama “Nilikufikiria,” au “Ninajali.”
Katika ndoa, mume au mke anapopewa zawadi, hufungua moyo wake kwa namna ya kipekee.
Hujisikia kuona kuwa mwenza wake amemkumbuka, amemjali na ameona ni muhimu kumletea kitu. Hii hujenga hali ya ukaribu, huondoa baridi ya kihisia, na kuimarisha mawasiliano.
Zawadi na ushirikiano wa kihisia
Zawadi huleta hisia chanya na hutengeneza kumbukumbu nzuri. Fikiria hili: mume anaporudi nyumbani na zawadi ya pipi anayoijua mke wake anapenda, au mke anapoandika ujumbe mfupi wa mapenzi na kuuweka kwenye mfuko wa koti la mume wake kabla hajaenda kazini.
Vitendo hivi vidogo vina nguvu ya kutikisa moyo kwa furaha. Hii ni ishara kuwa kila mmoja anamfikiria mwenzake, hata katika shughuli za kila siku.
Zawadi hizo ndogo husaidia pia katika kurekebisha hali ya kihisia kati ya wanandoa, hasa baada ya migogoro au kutokuelewana.
Wakati mwingine, badala ya maneno mengi, zawadi ndogo inaweza kusema mengi. Inaweza kuwa njia ya kuomba msamaha au kuonesha kuwa bado kuna mapenzi licha ya changamoto zilizojitokeza.
Kujenga mazoea ya kupeana zawadi
Mazoea haya hayahitaji bajeti kubwa. Unapompelekea mwenza wako maua uliochuma bustanini au kumpikia chakula anachopenda na kumshangaza kazini kwake, unamtengenezea kumbukumbu ambazo pesa haiwezi kununua.
Zawadi hizi ndogo zinaweza kuwa na nguvu zaidi ya dhahabu kwa sababu zimeambatana na fikra, upendo, na juhudi binafsi.
Katika ndoa nyingi zinazodumu kwa muda mrefu na kwa mafanikio, utagundua kwamba si mali kubwa zilizounga mkono mapenzi yao, bali ni mambo madogo yaliyofanywa kwa moyo mkubwa.
Zawadi ni moja ya ishara za upendo ambazo hazichoshi. Zinapotolewa mara kwa mara, zinaweza kuwa kama mbolea ya uhusiano kwa kuchochea ukuaji wa hisia, kuimarisha ukaribu na kuleta furaha ya kudumu.
Zawadi kama kumbukumbu
Kila zawadi ina hadithi. Maua aliyoyapokea mke katika siku ya kumbukumbu ya ndoa au saa ya mkononi aliyonunuliwa mume, hizi ni zawadi ambazo, miaka mingi baadaye, huweza kuchochea mazungumzo ya furaha na kumbukumbu ya upendo. Wanandoa wanapopeana zawadi kwa nyakati mbalimbali kama siku ya kuzaliwa, siku ya harusi au hata bila sababu yoyote maalum, wanatengeneza historia ya mapenzi yao kwa vitendo.
Ni zawadi hizi ndogo ndogo zinazogeuka kuwa kumbukumbu kubwa zenye thamani.
Huwezi kamwe kusahau maua ya kwanza uliyopokea kutoka kwa mumeo, au hereni ndogo alizokununulia mkeo siku uliyokuwa na huzuni.
Zawadi huwa sehemu ya hadithi ya mapenzi, na hadithi hiyo huwa hazina ya kihisia kwa wanandoa.
Zawadi na jitihada za kuendeleza mapenzi
Katika kila uhusiano wa muda mrefu, kuna wakati mapenzi yanapoa. Si kwa sababu wanandoa hawapendani tena, bali ni kwa sababu ya ratiba, kazi, watoto na changamoto za maisha.
Katika nyakati kama hizi, zawadi huwa kama moto mdogo unaochochea tena joto la mapenzi.
Unapomkumbusha mwenza wako kwa zawadi ndogo tu, unaamsha hisia zilizokuwa zimelala. Ni kama kuhuisha upendo wa mwanzo.
Watu wanapopeana zawadi, wanarudia kusema “nakupenda” bila hata kutumia maneno. Ni njia isiyo ya moja kwa moja, lakini yenye maana sana.
Zawadi haipaswi kupimwa kwa thamani ya pesa, bali kwa dhamira ya mtoa zawadi.
Wakati mwingine, barua ya mkono iliyoandikwa kwa mapenzi inaweza kuwa na maana zaidi ya simu mpya ya bei ghali Keki ya nyumbani inaweza kuwa na ladha bora zaidi ya chakula cha mgahawani, ikiwa imetoka moyoni.
Katika ndoa, zawadi ni zaidi ya vitu, ni njia ya mawasiliano, ni ishara ya kujali, na ni msumari unaounganisha moyo na moyo.
Iwe ni pipi ya kijiti, maua ya bustani, kadi ndogo, au zawadi ya kifahari, kila moja huleta nuru katika ndoa na hujenga daraja la mawasiliano ya kihisia.
Tukumbuke kuwa zawadi, hata zile ndogo kabisa, zina nafasi kubwa katika kujenga na kuimarisha uhusiano wa ndoa.
Ni silaha ya upendo isiyopaswa kupuuzwa. Katika ulimwengu wa leo uliojaa haraka na misukosuko, zawadi ni namna rahisi ya kusema, “Nakupenda, Nakuona, na Nakuthamini.”
Na katika lugha ya moyo, hakuna zawadi ndogo, kila zawadi ni kubwa inapokuwa na upendo ndani yake.
Umpe zawadi gani mwenza?
Kuna aina nyingi za zawadi unazoweza kumpa mwenza wako kulingana na mazingira, mahitaji, au hisia unazotaka kuonyesha.
Siyo lazima ziwe za gharama kubwa, cha msingi ni upendo uliomo kwenye zawadi hiyo. Tuone baadhi ya aina za zawadi ambazo unaweza kumpa mwenza wako.
Moja, zawadi za kihisia kwa kumwandikia barua ya mapenzi, kumtumia ujumbe mfupi wa kumfariji au kumpongeza au video fupi ya maneno ya upendo au shukrani. Pia kumwandalia kadi ya mapenzi iliyoandikwa kwa mkono wako.
Pili, zawadi za kila siku (za kawaida lakini zenye kugusa moyo) kama pipi anayoipenda, maua, chakula au kinywaji anachopenda ukimletea kazini au nyumbani.
Tatu, zawadi za kimatendo ikiwamo
kumvalia nguo anazopenda kukuona umevaa, kumsaidia kazi za nyumbani bila kuulizwa, kumpeleka sehemu ya utulivu au matembezi mafupi na kumletea kifurushi au bidhaa aliyoitamani kwa muda.
Nne, zawadi za kidijitali kama nyimbo za mapenzi, picha yenu iliyoandaliwa vizuri, kuweka picha yake katika simu au kifaa chako cha mawasiliano
Tano, zawadi za kumbukumbu kama album ya picha zenu za pamoja na kitu cha kumbukumbu ya siku ya harusi, uchumba au siku ya kwanza kukutana.
Sita, zawadi za kimwili (za vitu vya kutumia) kama saa, hereni, manukato, pochi, viatu, kitabu anachopenda, nguo alizotamani na vyombo vya jikoni/vyumbani ikiwa anavipenda.
Saba, zawadi za kiroho.Mwenza ni muumini wa dini? Fanya yale ayapendayo kukuza imani yake.
Muhimu kukumbuka kuwa zawadi bora ni ile inayoendana na tabia, hulka, na mahitaji ya mwenza wako hasa baada ya kumsoma anachopendelea. Unapomjua vizuri, unaweza kumpa zawadi ya kumgusa moyo moja kwa moja na ikawa na athari kubwa katika uhusiano wenu.