Nchini Uturuki, jaji ameamuru siku ya Jumapili Machi 23, 2025 kufungwa kwa Ekrem Imamoğlu, mpinzani mkuu wa Rais Recep Tayyip Erdoğan kwa makosa ya “ufisadi”. Pia amefukuzwa kazi. Ekrem Imamoğlu anashutumu “kunyongwa bila kesi.” Uamuzi wa kumfunga jela unaweza kuzidisha hasira inayotanda nchini, kwani inakuja siku chache kabla ya kuteuliwa kuwa mgombea mkuu wa upinzani katika uchaguzi wa urais wa mwaka 2028.
Imechapishwa:
Dakika 1
Matangazo ya kibiashara
Ingawa uamuzi wa mahakama wa kumfunga gerezani haukushangaza wengi, hakika utaibua hasira nyingi kote Uturuki, anaripoti mwandishi wetu maalum huko Istanbul, Anne Andlauer. Hasa kwa vile wapinzani wa serikali tayari wamekuwa wakihamasishana kwa siku nne.
Ekrem Imamoğlu, ambaye kifungo chake kiliombwa na upande wa mashtaka, anatuhumiwa kuongoza “kundi la wahalifu.” Anashitakiwa katika mifumo miwili ya uchunguzi, mmoja kwa “ufisadi” na mwingine “kusaidia kundi la kigaidi,” Chama cha Wafanyakazi wa Kurdistan (PKK).
Kwa kuwa kifungo hicho kimewekwa kama sehemu ya uchunguzi wa kwanza, na sio kwa tuhuma za ugaidi, viongozi wa Uturuki hawawezi kuweka jiji kubwa zaidi la nchi chini ya usimamizi. Hii labda ni kwa matumaini ya kutuliza au kudhibiti mivutano mitaani.
Ekrem Imamoğlu pia amefukuzwa kazi, Wizara ya Mambo ya Ndani ya Uturuki imetangaza katika taarifa: “Ekrem Imamoğlu, meya wa mji wa Istanbul (…) amesimamishwa kazi.” “Mchakato wa kisheria unaoendelea hauko sawa. “Huu ni unyongaji bila kesi,” meya ameshutumu katika taarifa iliyotolewa na mawakili wake.
Baraza la halmashauri ya Istanbul linaloshikiliwa na upinzani linatarajiwa kumchagua meya mpya katika siku zijazo.
Chama cha Ekrem Imamoğlu kinapiga kura kumchagua mgombea wake.
Wakati wafuasi wa Ekrem Imamoğlu wakijiandaa kuandamana tena, wanachama wa chama cha Republican People’s Party (CHP) wameanza kupiga kura asubuhi ya leo katika mchujo wa kumchagua mgombea wao kwa uchaguzi ujao wa urais uliopangwa kufanyika mwaka 2028. Ekrem Imamoğlu ndiye mgombea pekee katika kinyang’anyiro hicho. Siku ya Jumapili, mahakama imemfunga jela mgombea wa chama kikuu cha upinzani nchini Uturuki. Kwa sababu chama hiki cha kwanza cha upinzani cha Uturuki kilikuwa tayari kimetangaza tarehe hii kuandaa mchujo wake.
