Katika ulimwengu wa sasa wa mabadiliko ya haraka ya kiuchumi na kijamii, mafunzo ya usimamizi wa fedha kwa watoto yamekuwa jambo la msingi sana linalohitaji kupewa kipaumbele na wazazi, walimu pamoja na jamii kwa ujumla.
Hii ni kwa sababu watoto wa leo ndio viongozi wa kesho, na ili waweze kufanya uamuzi wa kifedha kwa ufanisi, wanahitaji kupatiwa ujuzi huo mapema katika maisha yao.
Kwanza kabisa, ni muhimu kutambua kwamba mafunzo ya fedha si tu kwa watu wazima. Watoto, hata wakiwa na umri mdogo, wanaweza kufundishwa misingi ya bajeti, akiba, matumizi sahihi na hata uwekezaji wa fedha.
Kwa mfano, mtoto anaweza kufundishwa jinsi ya kupanga matumizi ya fedha anazopatiwa kama posho au zawadi, kwa kugawanya katika makundi ya matumizi, akiba na kusaidia wengine. Kwa kufanya hivyo, wanajifunza nidhamu ya kifedha ambayo itawasaidia maisha yao yote.
Aidha, mafunzo haya hujenga uwezo wa kufanya uamuzi wa busara kifedha. Wakati mwingine, watoto wanapokuwa na fedha mikononi mwao, hujihusisha na matumizi ya kiholela. Hali hii hutokana na ukosefu wa maarifa sahihi ya fedha.
Hivyo basi, kupitia mafunzo rasmi au yasiyo rasmi, watoto wanaweza kuelewa thamani ya pesa, tofauti kati ya mahitaji na matamanio pamoja na hatari ya matumizi ya mikopo isiyo na mpango.
Kwa mfano, kwa kutumia michezo ya kielimu au hadithi zenye mafunzo ya kifedha, watoto wanaweza kuelewa dhana hizi kwa njia rahisi na ya kuvutia.
Vilevile, tafiti zinaonesha kuwa watoto wanaofundishwa usimamizi wa fedha mapema, huwa na tabia nzuri ya kifedha wanapokuwa watu wazima.
Kwa mujibu wa Shirika la Fedha Duniani (IMF, 2022), watoto wanaopokea mafunzo ya kifedha kabla ya umri wa miaka 15 huwa na uwezekano mkubwa wa kuwa na akiba ya benki, kuepuka madeni yasiyo ya lazima, na kufanya uamuzi bora wa kiuchumi wanapokuwa watu wazima.
Kwa mantiki hii, mafanikio ya kifedha ya mtu mzima yanaweza kuanzia utotoni kupitia mafunzo haya.Mbali na hilo, mafunzo haya huweza kupunguza utegemezi wa kifedha katika familia.
Mtoto anayejua kutunza fedha anaweza kusaidia familia yake kwa njia chanya, kama vile kusaidia katika shughuli ndogondogo za uzalishaji au kuhifadhi fedha kwa ajili ya matumizi ya baadaye ya shule au mahitaji mengine. Kwa kufanya hivi, watoto hujifunza pia maadili ya uwajibikaji na kujitegemea.
Ni dhahiri kuwa mafunzo ya usimamizi wa fedha kwa watoto ni nyenzo muhimu sana katika kujenga jamii yenye watu walioelimika kifedha.
Ili kufanikisha hilo, ni vyema taasisi za elimu, familia na jamii kushirikiana katika kuandaa mitaala na mazingira rafiki yatakayowawezesha watoto kujifunza masuala haya kwa njia ya ubunifu na ya kuvutia.
Hii ndiyo njia bora ya kuwekeza kwa vizazi vijavyo vilivyo na uwezo wa kufanya uamuzi wa kifedha kwa busara.