Rais wa Marekani Donald Trump amesema kuwa makubaliano yatafikiwa kwa ajili ya uuzaji wa shughuli za Marekani za mtandao wa kijamii wa TikTok wa China, ambao rais wa Marekani anatumai “utabaki hai” nchini mwake.
Imechapishwa:
Dakika 1
Matangazo ya kibiashara
“Kutakuwa na makubaliano kwa TikTok,” Donald Trump amesema siku ya Jumapili wakati wa mazungumzo na waandishi wa habari ndani ya ndege ya rais ya Air Force One.
“Tuna wanunuzi wengi. Kuna maslahi mengi katika TikTok,” amesema pia.
Aliporejea Ikulu ya White House mnamo Januari 20, kiongozi huyo wa Republican aliipa ByteDance, kampuni mama ya TikTok ya China, makataa ya siku 75, hadi Aprili 5, kuuza shughuli zake za Marekani.
Iwapo litashindwa kuuzwa kufikia tarehe hiyo, jukwaa hilo maarufu linatarajiwa kupigwa marufuku nchini Marekani, chini ya masharti ya sheria iliyopitishwa mwaka jana kwa jina la kulinda usalama wa taifa.
Washindani kadhaa wa Marekani wako mbioni kupata TikTok, ikijumuisha kampuni ya ujasusi bandia ya Perplexity AI na Project Liberty, inayoongozwa na mmiliki wa Olympique de Marseille Frank McCourt, ingawa ByteDance haijaonyesha nia yake ya kuuza.
“Pia tunashughulika na China kuhusu suala hili, kwa sababu wanaweza kuhusika,” Donald Trump amesema siku ya Jumapili. “Na tutaona kitakachotokea. Lakini nadhani kutakuwa na kitu.”
Mnamo mwaka 2020, mwishoni mwa muhula wake wa kwanza, bilionea huyo wa zamani wa mali isiyohamishika alitafuta, bila mafanikio, kupiga marufuku TikTok nchini Marekani.
Alibadilisha mawazo yake wakati wa kampeni yake ya mwisho, akitetea programu hiyo, ambayo inapendwa sana na vijana na ambayo ina watumiaji milioni 170 nchini.
“Ningependa kuweka TikTok iendelee kufanya kazi,” Donald Trump amesema. “Kuzungumza kwa ubinafsi, nilishinda kura ya vijana kwa pointi 36. Warepublican kwa ujumla hawafanyi vizuri kwa vijana, na nadhani mengi ya hayo yanaweza kuwa kutokana na TikTok.”
