Rwanda imetangaza siku ya Jumanne kusimamisha programu za misaada ya maendeleo ya Ubelgiji nchini humo, ikishutumu mkoloni huyu wa zamani kuegemea Kinshasa na kuishumu katika mzozo unaoendelea mashariki mwa DRC.
Imechapishwa:
Dakika 2
Matangazo ya kibiashara
“Ubelgiji imeongoza kampeni kali, pamoja na DRC, yenye lengo la kuhujumu upatikanaji wa fedha za maendeleo kwa Rwanda, ikiwa ni pamoja na kutoka kwa taasisi za kimataifa,” Wizara ya Mambo ya Nje ya Rwanda imelaani katika taarifa yake. “Kuingiza siasa katika maendeleo kimsingi hakukubaliki,” imeongeza diplomasia ya Rwanda, ikilaani hatua “ambazo zinaweza tu kuonekana kama uingiliaji wa nje usio na msingi.”
“Hatua hizi zinaonyesha kwamba hakuna tena msingi thabiti wa ushirikiano wa kimaendeleo na Ubelgiji. Kwa hiyo, Rwanda inasitisha sehemu iliyosalia ya mpango wa misaada wa pande mbili na Ubelgiji wa mwaka 2024-2029,” imehitimisha. Bajeti ya mpango huu wa nchi mbili ni euro milioni 120 kulingana na tovuti ya shirika la maendeleo la Ubelgiji Enabel.
Mwishoni mwa mwezi wa Januari Ubelgiji, ukoloni wa zamani wa DRC (zamani Zaire) na Rwanda, iliutaka Umoja wa Ulaya kuzingatia vikwazo dhidi ya Rwanda, wakati wanajeshi wa M23 na Rwanda walikuwa wametoka tu kuuteka mji wa Goma, jiji kubwa na kitovu cha kiuchumi cha mkoa wa Kivu Kaskazini. Siku ya Jumapili, kundi la waasi wenye silaha la M23 na washirika wake waliteka Bukavu, mji mkuu wa mkoa wa Kivu Kusini, ambao unapakana na Kivu Kaskazini.
Wito kutoka kwa jumuiya ya kimataifa kwa ajili ya kupunguza mgogoro huo umeongezeka bila mafanikio, dhidi ya hali ya hofu ya kutokea kwa vita vya kikanda. Siku ya Jumamosi, EU ilitangaza baada ya Bunge la Ulaya kutaka kusitishwa kwa ushirikiano wa malighafi na Rwanda, kwamba inachunguza “haraka” chaguzi zote zilizopo. Hakuna kilichotangazwa hadi sasa. Kinshasa inaishutumu Kigali hasa kwa kutaka kudhibiti shughuli za uchimbaji madini na biashara ya madini – ambayo ardhi ndogo ya mashariki mwa DRC ni tajiri – inayotumika katika betri na vifaa vya kielektroniki.
Rwanda inakanusha madai hayo, ikisema usalama wake unatishiwa na makundi yenye silaha katika eneo hilo, ikiwa ni pamoja na Democratic Forces for the Liberation of Rwanda (FDLR), iliyoundwa na viongozi wa zamani wa Kihutu waliohusika katika mauaji ya kimbari dhidi ya Watutsi nchini Rwanda. Kwa jumla, Rwanda inapokea takriban dola bilioni 1.3 kama msaada wa kimataifa, mapato makubwa wakati bajeti yake ya mwisho ya mwaka ilikuwa karibu dola bilioni 4.
