Shule nyingi hazimuandai mwanafunzi katika eneo la elimu kuhusu fedha. Shule chache ambazo hutoa elimu ya fedha hufanya hivyo kwa mtazamo wa jumla.
Kuna maarifa muhimu ya uchumi wa familia ambayo mara nyingi hayajumuishwi kwenye mitalaa rasmi. Maarifa haya ni muhimu kwa kila mtu ili kujenga msingi mzuri wa usimamizi wa fedha binafsi na kuhakikisha ustawi wa kifamilia katika maeneo tofauti kama ifuatavyo;
Usimamizi halisi wa bajeti: Shuleni, wanafunzi hujifunza nadharia za bajeti, lakini hawafundishwi jinsi ya kuandaa na kufuata bajeti halisi maishani.
Watu wengi wanapopata mapato, hukosa kupanga matumizi yao, jambo linalosababisha matatizo ya kifedha.
Maarifa ya kuweka kipaumbele kwa matumizi ya lazima na kujifunza mbinu za kutengeneza na kutekeleza bajeti ni muhimu sana kwa kila familia.
Kudhibiti matumizi ya pesa: Shule haziwafundishi wanafunzi jinsi ya kudhibiti tamaa ya matumizi yasiyo ya lazima.
Kujifunza kutofautisha kati ya mahitaji na matakwa ni jambo ambalo familia nyingi hujifunza kupitia makosa. Maarifa haya yanapaswa kufundishwa mapema ili kusaidia watu kuwa na nidhamu ya kifedha.
Akiba na dhana ya dharura: Ingawa akiba hutajwa katika masomo ya uchumi, shule nyingi hazifundishi umuhimu wa kuwa na mfuko wa dharura.
Familia nyingi hukumbwa na changamoto za kifedha kwa sababu hazina akiba ya kutosha kwa matukio yasiyotegemewa kama magonjwa, dharura za kazi, au ajali. Kujifunza kuweka akiba mapema kunasaidia kuepuka mzunguko wa madeni.
Mbinu za uwekezaji: Elimu ya shule mara nyingi hujikita kwenye nadharia ya uwekezaji, lakini haitoi uelewa wa vitendo wa jinsi ya kuwekeza kwa ufanisi.
Maarifa kuhusu uwekezaji wa muda mrefu kama kununua ardhi, hisa, biashara ndogo, na mali nyinginezo hujifunzwa tu baada ya mtu kuanza maisha ya kujitegemea.
Elimu hii inapaswa kutolewa mapema ili kuwasaidia watu kuanza safari yao ya kifedha mapema na kwa ufanisi.
Mikopo na madeni ya kifedha: Mikopo ni sehemu ya maisha ya kifedha, lakini watu wengi hawajifunzi jinsi ya kutumia mikopo kwa busara.
Shule haziwafundishi wanafunzi jinsi ya kuchagua mikopo yenye riba nafuu, kujua athari za deni la muda mrefu, au mbinu bora za kulipa madeni bila kudhoofisha uchumi wa familia. Matokeo yake, wengi huingia kwenye madeni makubwa bila mpango wa urejeshaji.
Kujiongeza kipato (Side Hustles): Katika dunia ya sasa, kutegemea mshahara pekee kunaweza kuwa hatari. Hata hivyo, shule haziwafundishi wanafunzi jinsi ya kuwa wabunifu na kuongeza vyanzo vya mapato kupitia biashara ndogo au kazi za ziada.
Kujifunza mbinu za kuanzisha miradi midogo kunaweza kusaidia familia kuwa na uhakika wa kifedha hata wakati wa changamoto za kiuchumi.
Jinsi ya kufanya uamuzi wa kifedha: Uamuzi wa kifedha unahitaji maarifa na utafiti wa kina. Watu wengi huingia kwenye matatizo ya kifedha kwa sababu ya kufanya uamuzi mbaya, kama kununua vitu vya gharama kubwa bila mpango au kuwekeza bila utafiti wa kutosha.
Shule haziwafundishi wanafunzi jinsi ya kufanya uamuzi bora wa kifedha unohakikisha uthabiti wa uchumi wa familia.
Elimu ya uchumi wa familia inayotolewa shuleni mara nyingi ni ya kinadharia na haizingatii changamoto za kifedha za maisha halisi.
Kujifunza jinsi ya kusimamia bajeti, kudhibiti matumizi, kuwekeza, na kukabiliana na madeni, ni ujuzi muhimu unaopaswa kufundishwa mapema.
Ikiwa elimu hii itatolewa kwa vitendo, familia nyingi zitakuwa na uthabiti wa kifedha na kuepuka matatizo ya madeni na ufukara.