Akiwa ziarani Brussels kwa muda wa siku mbili zilizopita huku mashambulizi ya M23 yakiungwa mkono na majeshi ya Rwanda yakiendelea mashariki mwa DRC, Waziri wa Mambo ya Nje wa Rwanda Olivier Nduhungirehe ameendeleza mashambulizi ya kidiplomasia ya Kigali katika Umoja wa Ulaya, ambao unaendelea kutishia vikwazo dhidi ya Rwanda.
Imechapishwa:
Dakika 1
Matangazo ya kibiashara
Na wanahabari wetu huko Brussels na Kigali, Pierre Bénazet na Lucie Mouillaud
Ziara ya Waziri wa Mambo ya Nje wa Rwanda mjini Brussels siku ya Jumatatu tarehe 10 na Jumanne Machi 11 iliangaziwa na mikutano miwili mikuu ambapo alitaka kusisitiza wasiwasi wa usalama wa Kigali, ambao alisema “umepuuzwa kwa muda mrefu au kutupiliwa mbali”.
Olivier Nduhungirehe alikutana kwa mara ya kwanza na mkuu wa diplomasia ya Ulaya, Kaja Kallas, ambaye alikuwa na nia ya dhati ya kuthibitisha tena wazo kwamba mzozo wa mashariki mwa DRC “haujachochewa na Rwanda”. Rwanda “haikubali kubeba mzigo wa kushindwa kwa usalama na utawala wa DRC,” alimwambia.
Waziri wa Mambo ya Nje wa Rwanda kisha alikutana na Kamishna wa Umoja wa Ulaya (EU) mwenye dhamana ya Ushirikiano wa Kimataifa, Jozef Sikela, ambaye alishikilia kuwa Rwanda “imejitolea kuleta amani katika eneo la Maziwa Makuu”, kwa matumaini ya kuona “ushirikiano wa kiuchumi na maendeleo” ukianza.
Vikwazo
Kwa upande wao, Kaja Kallas na Jozef Sikela walimpa ujumbe ule ule: “Rwanda lazima iheshimu uhuru wa eneo la DRC” na kushiriki katika mazungumzo “na washikadau wote,” walijibu, wakati EU inaendelea kutumaini kuwa suluhu la kisiasa la mgogoro huo linaweza kuanzishwa na mkutano wa pamoja wa mawaziri wa Jumuiya ya Afrika Mashariki (EAC) na Jumuiya ya Maendeleo ya Kusini mwa Afrika (SADC). Mkutano huo umeahirishwa kwa wakati huu na EU inasubiri ufanyike kabla ya kuweka vikwazo vinavyowezekana dhidi ya kampuni moja ya Rwanda na maafisa tisa wa Rwanda.
“Tafsiri potofu na ya upendeleo ya mgogoro huo, pamoja na hatua za upande mmoja dhidi ya Rwanda, haziwezi kuleta suluhu,” Olivier Nduhungirehe alijibu.
