Vuguvugu la waasi na kijeshi la AFC-M23 linaendelea kusonga mbele. Baada ya siku nne za mapigano dhidi ya jeshi la Kongo na makundi yenye silaha yanayounga mkono majeshi ya serikali ya FARDC, vuguvugu la kisiasa na kijeshi linaloungwa mkono na Rwanda limechukua udhibiti wa Nyabiondo, eneo lililo katika eneo la Masisi, zaidi ya kilomita mia moja kutoka Goma.
Imechapishwa:
Dakika 1
Matangazo ya kibiashara
Mafanikio haya mapya ya AFC-M23 huko Nyabiondo sasa yanafungua njia hadi Walikale, eneo lenye utajiri wa madini, hivyo kuongeza shinikizo kwa Wanajeshi wa Kongo (FARDC). Mvutano tayari umeonekana tangu Januari katika eneo hili la mashariki mwa Jamhuri ya Kidemokrasia ya Kongo (DRC). Katika kipindi cha wiki tatu zilizopita, takriban raia wanne waliuawa katika mapigano katikati mwa Masisi, inayoshikiliwa na AFC-M23.
Katika muda wa siku tatu zilizopita, waasi wamepata nguvu na wanaimarisha eneo lao. Kutoka Nyabiondo, sasa wanaweza kuendelea kuelekea Kashebere, kwenye barabara ya mkoa nambari 529. Barabara inayoelekea moja kwa moja hadi mjini kati Walikale, magharibi kidogo ya Nyabiondo. Kulingana na wataalamu, kutoka Walikale, wangeweza kuchukua barabara ya taifa nambari 3, ambayo inaelekea Kisangani. Umbali ni mrefu: takriban kilomita 600 kutoka Nyabiondo.
Wakati huo huo, katika Kivu Kusini, huko Kamanyola, mji ambao unafungua njia kuelekea Uvira, hali ni tulivu kwa wiki mbili. Uvira, ambapo serikali ya mkoa wa Kivu Kusini inafanyia kazi baada ya Bukavu kuanguka mikononi mwa mwa M23, inasalia chini ya udhibiti wa mamlaka ya Kongo. Wakati huo huo, jitihada za kidiplomasia zimekwama. Mchakato wa Nairobi na Luanda, ambao ulipaswa kuleta suluhu la kisiasa kwa mzozo huo, umesimama.
Hakuna tarehe iliyowekwa ya kuanzishwa tena kwa mchakato huo, wakati mapigano yakiendelea kurindima.
