Mpendwa Donie, Kwanza nikusalimu na kukupa kongole kwa kuukwaa unene uzeeni. Hivi, kweli jioni huwa unakumbuka yale uliyosema asubuhi?
Maana ukizungumza huwa sielewi kama unaelewa chochote na kama huko juu bado salama. Kwa uzee wako, tuyaache.
Je, bado unakumbuka kuwa umezuia misaada kwa wale uliowaita shitnonihino ambao ni matokeo ya ukoloni na utumwa vilivyowanufaisha ninyi na kuwaumiza wao milele?
Lifikirie hili kwa kina kaka. Pili, unajua kuwa bara la mafyatu halihitaji misaada yako uchwara yenye masharti kibao licha ya ngebe na nyodo? Yanini wakati lina rasilimali kibao? Je, tatizo ni kuwa na madini ardhini na udongo bongoni kwa wanene wetu?
Hata hivyo, kongole. Kuminya misaada huenda itasaidia kuacha utegemezi na uvivu wa kufikiri bila sababu. Nadhani watajifunza kulinda, kubuni na kutumia rasilimali na njuluku vizuri. Ila inasikitisha kila uchao, wanabomubomu na kukopakopa ilhali uchumi wanao ila wanaukalia. Najua. Huwa unajisifia ni bilionea. Wenzako wakifichua walizofyatua na kuficha, utaoneka kapuka wa kawaida. Nazama kwenye sababu za kukupongeza kama ifuatavyo:
Mosi, kukata mirija sorry, misaada. Ni fursa na funzo kwetu kujiheshimu, kuwa na utu, kujithamini na kuacha kujidhalilisha kwa kubomu na kukopakopa.
Pili, itawafumdisha Waafrika ubunifu badala ya ubabaishaji, ufisadi, upigaji, uvivu na ujambazi wa kimfumo.
Tatu, nashauri uwalazimishe wapambane na ufisi na ufisadi badala ya kuupamba na kuimbiana mapambio wakati hamna kitu.
Nne, tangu mtupe udhuru, sorry, uhuru ulionufaisha wachache, hatujaona maana yake kwa vile kaya zetu zinabomu na maisha ya mafyatu yanazidi kuwa magumu wakati ya wafyatuzi yakinawiri. Kitaalamu, hii huitwa kusikinishana kupitia mafyatu wanavyofyatuliwa bila kujua njuluku zao zinatumika vipi na nani. Tano, wanene watakwambia kaya haina njuluku. Ajabu, hao hao wanafuja kama hamnazo mbali na kutoa misamaha ya kodi kwa wachukuaji walau nao huku ikiwafyatua na kuwakamua mafyatu.
Utegemezi umeleta mateso kwa mafyatu na utumwa wa kujitakia kwa wanene wanaowachuuza kwa vijimisaada, vijisenti na mikopo uchwara. Sir God aliwapendelea lakini ukumbaff wao ukawalaanisha.
Sita, una habari? Baadhi ya wanene wa bara letu wana njuluku kuliko wewe na ubilionea wako wa mashaka hadi unawashobokea akina Irony Mask wanaokufyatua na kukutumia vibaya.
Saba, una habari hata vyeo wanapeana kiukoo, kiushikaji na vyata ambapo familia nzima inaongoza kaya. Kamuulize buda M7. Kama hujui jua.
Nane, hawa ombaomba wa kujitakia na kutegemea misaada wamepokea sana. Hata hivyo, ukiangalia walivyoridhika kuacha kufikiri, na kufuja misaada, unaweza kuzimika kama siyo kuzimia. Huwa najiuliza. Sijui nao kama wanajiuliza hata wewe.
Wataishi kwa kudhalilishwa hadi lini? Kwa wenye madini vichwani, unachofanya ni ukombozi ulengao kuwafikirisha na kuwafyatua mafyatu wafyatuke na kuwafyatua wanaowafyatua na kuwasikinisha wakati Uchumi wanao ila wanaukalia.
Hata hivyo, sijui kama wanakuelewa au kujiandaa. Nadhani wengi wanangoja miaka yako minne iyoyome warudie kwenye ‘business as usual’ ya kopo mkononi kiguu na njia kwenda kubomu na kujidhalilisha utadhani hawana madini kibao.
Mfano, hakuna kitu kimenishangaza kama kiasi cha njuluku unazotishia kuwanyima. Hivi kaya kama Bondeni kuinyima dolari milioni 40, inaweza kuyumba au kukuramba manonihino?
Tukiachana na kujimwambafy kwako, kaya yako ikilipa madeni inayodaiwa yote ambayo ni makubwa kuliko uchumi wako wote, utakuwa mgeni wa nani? Huoni kuwa hata kaya maskini ya mwisho itakuzidi ukwasi?
Mpendwa Don, kama rafiki yako Niitenyau, huwa nakuzimikia hakuna mfano fyatu wangu. Licha ya kukupongeza, nina ushauri ufuatao;
Wawakee vikwazo mafisadi wanaofuja njuluku, rasilimali na uchumi wa kaya zao hadi wanashindwa hata kutengeneza viwembe. Wazuie kuja huko kuficha na kutanua, tafadhali. Unaweza kuamini kuwa bara lenye ardhi yenye rutuba na hali za hewa zinazotabirika, maziwa, mito na nguvukazi linaagiza vyakula toka viinchi tena uchwara? Mikono na vichwa vyao vya kazi gani? Nashauri ukaze kamba kieleweke.
Don, kabla ya kumaliza nikukumbushe. Nilipanga kuja kutanua huko baada ya kipupwe. Baada ya kuja juu na kufurusha mafyatu wazamizi, nimeachana na ujinga huu. Badala yake, napanga kuanzisha Chama cha Kupambana na Ujidhalilisha (CCKU) ili niwaamshe mafyatu wafyatuke na kuwafyatua mafyatu wanaowafyatua na kufyatua njuluku na uchumi wao na kuwasikinisha. Wacha niishie hapa usijeniwekea vikwazo bure.