Leo ni Sikukuu ya Wafanyakazi, siku ya mapumziko na fursa ya kutafakari malipo yanayotokana na kazi yetu, mshahara. Sikukuu hii inatukumbusha kusherehekea michango ya wafanyakazi na kutathmini fedha zetu za kibinafsi, ikiwa ni pamoja na mshahara, nyongeza zinazowezekana, na namna ambavyo tunaweza kujiongeza kwa mapato ya mshahara.
Unapaswa kujiuliza maswali kadhaa, mathalani; Je, unatumiaje mshahara wako? Je, unaweza kuwekeza kwa kutumia mshahara wako? Je, mshahara wako unatosheleza? Je, ni lini ilikuwa mara ya mwisho kupata nyongeza ya mshahara wako? Ni vigezo gani vinatumika ili kupata nyongeza ya mshahara wako?
Mshahara wako ni jiwe la msingi la maisha yako ya kifedha, hata kama una chanzo kingine cha fedha. Ili kuutumia vyema mshahara wako jaribu kufuata dondoo hizi.
1. Fahamu mapato yako halisi:
Angalia mshahara unaopata ili kuelewa makato ya kodi, hifadhi ya jamii, na bima ya afya. Mapato halisi ndiyo yanayopanga bajeti yako, hivyo tathmini ikiwa yanakidhi mahitaji na malengo yako.
2. Panga bajeti kwa busara:
Tumia kanuni itakayokuwezesha kutumia na kupanga matumizi yako vizuri zaidi. Unaweza kuainisha mahitaji ya msingi kama kodi, chakula, mavazi, usafiri, gharama za simu, umeme na maji pamoja na matumizi kama ya burudani au michango mbalimbali ukaainisha matumizi yake na kuweka vipaumbele na ukomo wa matumizi na hivyo kuweza kuishi kwa malengo. Ni vizuri kuweka lengo la kuweka akiba au kupunguza madeni pia.
3. Tafuta nyongeza ya mshahara au kazi za ziada:
Jadili na mwajiri habari ya nyongeza ya mshahara kwa kuonyesha mafanikio yako au mabadiliko ya gharama za kuishi. Fikiria pia kutumia muda wa ziada kujiendeleza kimasomo au kufanya kazi za kujitegemea kama uandishi wa vitabu, riwaya au kufanya kazi za bustani, biashara ndogo au ushauri elekezi kwenye eneo lako.
4. Jifunze kwa kuwa na vyeti vya utendaji: Wekeza katika kusoma masomo yatakayokupa vyeti vinavyotambuliwa na mamlaka mbalimbali katika fani yako ili kuweza kujiimarisha kikazi na kuwa na ufanisi zaidi wa kiutendaji. Soma kozi ya usimamizi wa fedha au miradi. Vyeti vya nyongeza vinaweza kuongeza mshahara na pia unaweza kubadili aina ya kada ya kazi inayoifanya.
5. Fanya uwekezaji:
Weka akiba ya dharura ya miezi, wekeza katika fedha za gharama za chini, na lipa madeni ya riba ya juu ili kujenga utajiri wa muda mrefu. Kama utapata nyongeza ya mshahara unaweza kudhamiria kuiwekeza yote au kuiwekea akiba. Jiunge na vikundi vya uwekezaji vya pamoja, au soma elimu ya kifedha ili kufanya maamuzi bora ya pesa.
6. Tafakari matumizi yako:
Tafakari iwepo ujenge, au uendelee kupanga na kama ni kujenga, je, hakutakuongezea gharama za ziada? Je, unapata unafuu kwa kutumia usafiri unaoutumia sasa na unaweza kubadili aina ya usafiri ukaokoa gharama?
Sikukuu ya Wafanyakazi ni ukumbusho wa kujitolea kuboresha fedha zako. Chukua hatua moja leo, iwe ni kujadili nyongeza, kuanza akiba, au kujifunza ustadi mpya kuelekea mustakabali salama zaidi wa kifedha.
