Waziri wa Ulinzi Brigedia Jenerali Aziz Nasirzadeh amesema Iran inao uwezo wa kuteketeza ‘darzeni’ za operesheni za kulipiza kisasi sawa na “Operesheni ya Ahadi ya Kweli” iliyotekeleza mwezi Aprili kulenga maeneo ya utawala wa Kizayuni wa Israel katika ardhi ya Palestina unayoikalia kwa mabavu.
Ebrahim Rezaei, Msemaji wa Kamati ya Bunge ya Usalama wa Taifa na Sera za Nje amesema, Jenerali Nasirzadeh alitoa kauli hiyo katika kikao cha kamati hiyo kilichofanyika jana Jumanne na akaongezea kwa kusema: “uwezo wa kiulinzi wa Iran ni wa kiwango cha juu”.
Operesheni ya Ahadi ya Kweli ilishuhudia Tehran ikirusha zaidi ya makombora 300 na ndege zisizo na rubani dhidi ya ngome na vituo vya kijeshi vya utawala wa Kizayuni kulipiza kisasi kwa uchokozi uliofanywa na utawala huo dhidi ya vituo vya kidiplomasia vya Iran katika mji mkuu wa Syria wa Damascus mapema mwezi huo.
Mnamo Oktoba Mosi pia, Jamhuri ya Kiislamu ilirusha makombora 200 kuelekea kambi za kijeshi na kijasusi za Israel kama sehemu ya Operesheni ya Ahadi ya Kweli II.
Operesheni hiyo ya pili ya Ahadi ya Kweli ilifanyika katika kukabiliana na ukhabithi mbaya zaidi uliofanywa na utawala haramu wa Israel dhidi ya Iran na mataifa mengine ya eneo hili, ukiwemo wa mauaji ya kigaidi ya Kiongozi wa Hamas Ismail Haniyah, Kiongozi wa Hizbullah ya Lebanon Sayyid Hassan Nasrullah, na Abbas Nilforoushan, kamanda wa Jeshi la Walinzi wa Mapinduzi ya Kiislamu (IRGC).
Kwa mujibu wa Rezaei, Waziri wa Ulinzi amesema, asilimia 90 ya makombora yaliyorushwa katika Operesheni ya Ahadi ya Kweli II yaligonga shabaha zilizokusudiwa, lakini utawala wa Kizayuni ulijaribu kuchuja na kudhibiti ukweli halisi kuhusu operesheni hiyo.
Wakati huo huo, Brigedia Jenerali Aziz Nasirzadeh amezungumzia mashambulizi yaliyofanywa wiki iliyopita na utawala wa Kizayuni dhidi ya vituo vya ulinzi katika mikoa ya Tehran, Khuzestan, na Ilam.
Amesema, mashambulizi hayo hayakuweza kuleta madhara makubwa katika mzunguko wa utengenezaji makombora na mfumo wa ulinzi nchini na akaongeza kuwa madhara yote yaliyosababishwa na shambulio hilo yamesawazishwa.
Katika upande mwingine, Msemaji wa Kamati ya Bunge ya usalama wa Taifa na Sera za Nje Rezaei amebainisha kuwa katika kikao hicho cha jana baadhi ya wabunge walilalamikia hatua ya serikali za Jordan na Iraq kuruhusu anga za nchi zao kutumiwa na utawala wa Israel kufanya mashambulizi dhidi ya Iran…/
