Mboga za majani na matunda ni sehemu muhimu katika mlo wa kila siku, hasa kwa watoto wanaoendelea kukua na wenye kisukari.
Vyakula hivi vinatoa virutubisho muhimu vinavyosaidia katika ukuaji wa mwili na udhibiti wa viwango vya sukari, kuimarisha kinga ya mwili, na kuzuia magonjwa mbalimbali. Mboga za majani na matunda ni chanzo kizuri cha vitamini, madini na nyuzinyuzi (fiber) ambazo ni muhimu kwa afya ya mtoto.
Kwa mfano, mboga za majani kama mchicha, kisamvu na matembele ni matajiri wa vitamini A na C, ambazo husaidia katika kuimarisha kinga ya mwili na afya ya ngozi. Pia, nyuzinyuzi zilizomo katika mboga hizi husaidia katika mmeng’enyo wa chakula na kuzuia tatizo la kuvimbiwa.
Kutokula mboga za majani na matunda, kunaweza kusababisha upungufu wa virutubisho muhimu mwilini na hivyo kuathiri ukuaji wa mtoto.
Upungufu wa vitamini A unaweza kusababisha matatizo ya kuona, wakati upungufu wa vitamin C unaweza kuathiri kinga ya mwili na kusababisha magonjwa kila mara.
Pia, upungufu wa nyuzinyuzi unaweza kusababisha matatizo ya mmeng’enyo wa chakula. Ulaji wa mboga za majani na matunda husaidia katika kudhibiti kiwango cha sukari mwilini.
Mboga za majani na matunda zina nyuzinyuzi nyingi, ambazo husaidia katika kudhibiti kiwango cha sukari kwa kupunguza kasi ya kufyonzwa kwa sukari mwilini.
Ulaji wa mboga za majani na matunda, husaidia katika kudumisha uzito wa afya, hii ni muhimu kwa watoto wenye kisukari. Sahani ya chakula lazima itawaliwe na wingi wa vyakula vyenye virutubisho na nyuzinyuzi.
Mbogamboga hizi za majani zina virutubisho muhimu kama vitamini, madini na nyuzinyuzi ambazo husaidia kudhibiti viwango vya sukari kwenye damu na kuboresha afya kwa ujumla, lakini pia utajiri wa nyuzinyuzi husaidia kupunguza kasi ya ufyonzwaji wa sukari kwenye damu, hivyo kudhibiti viwango vya sukari.
Ni muhimu kuchagua mboga za majani zenye rangi tofauti kama spinach, kabeji, brokoli, ili kupata virutubisho mbalimbali. Ulaji wa mboga za majani na matunda ni sehemu muhimu ya kudhibiti kisukari.
Inashauriwa kuonana na mtaalamu wa lishe kwa ushauri kulingana na mahitaji ya mtoto wako ili kusaidia katika ukuaji, kuimarisha kinga ya mwili na kuzuia maradhi.
Ni muhimu kwa wazazi na walezi, kuhakikisha kuwa watoto wanapata mlo kamili unaojumuisha mboga za majani na matunda.
