Serikali ya Jamhuri ya Kidemokrasia ya Kongo na waasi wa M23 wameanza mazungumzo ya amani nchini Qatar baada ya siku kadhaa za machafuko. Kundi la M23 limejiondoa katika mji wa Walikale na mazungumzo yataendelea wiki ijayo.
Imechapishwa:
Dakika 1
Matangazo ya kibiashara
Ujumbe kutoka serikali ya Jamhuri ya Kidemokrasia ya Kongo (DRC) ulifanya mazungumzo mapya na waasi wa M23 nchini Qatar wiki iliyopita ili kumaliza mapigano mashariki mwa nchi hiyo, chanzo kinachofahamu majadiliano hayo kimeyaambia mashirika ya habari ya REUTERS na ya AFP siku ya Jumamosi.
Pande zote mbili bado hazijatoa maoni yoyote kuhusu mazungumzo hayo.
Duru ya kwanza ya mazungumzo, ambayo ilifanyika mwishoni mwa mwezi wa Machi, ilielezewa kama “chanya” na chanzo kilicho karibu na majadiliano. Mkutano huo ulifanyika katika faragha na mazungumzo yanatarajiwa kuendelea mjini Doha Aprili 9. “Majadiliano zaidi sasa yanatarajiwa Doha, tena na upatanishi wa Qatar, ili kudumisha kasi na kutafuta suluhu zenye kujenga za kumaliza mzozo huo kwa amani,” chanzo kimeliambia shirika la habari la AFP.
Siku ya Alhamisi jeshi la Kongo lilitangaza kuwaondoa waasi katika kitovu cha uchimbaji madini cha Walikale, kama ilivyokubaliwa wakati wa mazungumzo mwezi Machi. Awali, waliwashutumu M23 kwa kutoheshimu ahadi yake.
Walikale ndio eneo la magharibi zaidi ambapo M23 imefika.
Mgogoro nchini Kongo
Utata wa mzozo wa mashariki mwa Kongo, uliotokana na matokeo ya mauaji ya kimbari ya mwaka 1994 na ushindani wa rasilimali za madini nchini Rwanda, unatatiza zaidi juhudi za upatanishi.
DRC ina akiba kubwa ya lithiamu, kobalti na madini mengine, haswa mashariki. Hii ilizua uasi na mapigano kadhaa kwa udhibiti wa eneo hilo.
Kundi la waasi la M23, linaloongozwa na watu kutoka jamii ya Watutsi, lilianzishwa mwaka 2012 na linasalia kuwa moja ya makundi yenye nguvu zaidi katika eneo hilo.
Rwanda imeshutumiwa kwa kuunga mkono kundi la M23, madai ambayo imekanusha.
Machafuko nchini Kongo pia yameenea katika kanda nzima, huku Uganda na Burundi zikiwa na wanajeshi nchini humo.
