Mkutano wa nishati wa wakuu wa nchi za Afrika wa siku mbili, ni tukio muhimu linalolenga kubuni mikakati ya kukuza sekta ya nishati barani Afrika.
Mkutano huo unaoshirikisha viongozi wa nchi za Afrika pamoja na wadau mbalimbali, umejikita katika kujadili masuala ya nishati, ambayo ni kiungo muhimu katika maendeleo ya uchumi na jamii za Afrika.
Afrika inakumbana na changamoto kubwa katika upatikanaji wa nishati. Inakadiriwa kuwa zaidi ya watu milioni 600 barani Afrika hawana umeme, na hiki ni kikwazo kikubwa kwa maendeleo ya kijamii na kiuchumi.
Hali hii imekuwa ikichangia umaskini na kuathiri sekta muhimu kama vile afya, elimu, kilimo na viwanda. Hivyo, mkutano huu unatoa fursa ya kuangalia jinsi gani nishati ya umeme inaweza kuwa haki ya kila mtu, na namna ya kuhakikisha kuwa kila mwananchi wa Afrika anapata umeme kwa bei nafuu na kwa urahisi.
Viongozi wanajadili jinsi ya kuongeza uwekezaji katika sekta hii, ili nchi za Afrika ziweze kuzalisha umeme mwingi na wa kutosha kwa maendeleo ya viwanda na ustawi wa wananchi.
Tunatambua kuwa kupatikana kwa umeme wa uhakika na wa kutosha kwa kiasi kikubwa kutazisaidia nchi za Afrika ili zijitegemee katika nyanja mbalimbali.
Nchi za Afrika zikifanikiwa katika suala hili la nishati, ni wazi kuwa itakuwa mwarobani wa changamoto nyingi inazozikabili ikiwamo ya ukosefu wa ajira kwa vijana ambayo imeonekana kuwa mfupa mgumu kwa muda mrefu sasa.
Mafanikio ya jambo hilo yatafungua fursa nyingi kwa vijana, hivyo kuwa na uwanja mpana wa kujiongezea vipato.
Ni wazi kuwa umaskini wa nishati ni changamoto kubwa inayozuia maendeleo na ukuaji wa uchumi, kwani uwepo wake unachangia katika kuboresha maisha ya kila siku ya watu, hasa katika maeneo ya elimu, afya, ujuzi, na maisha ya kidijitali.
Vijana wengi wanahitaji ajira, na ajira inaweza kupatikana kwa kuwa na miundombinu bora ya nishati kwa kuwa umeme ni msingi wa kuwa na uwezo wa kufanya kazi yoyote.
Kwa hivyo, lengo la kuunganisha watu milioni 300 na umeme ifikapo mwaka 2030, linatoa matumaini ya kukuza uchumi wa Afrika na kuondoa mamilioni ya watu kwenye umaskini wa nishati. Mpango huu utafungua fursa za ajira kwa miongo ijayo, na kuhamasisha maendeleo ya kijamii.
Pamoja na kuwa na umeme, ni muhimu pia kuhusisha huduma za kidijitali ili kuongeza tija na ufikivu wa fursa za maendeleo kwa watu wa Afrika.
Hivyo, tunaamini mkutano huu ni fursa muhimu kwa kubuni suluhisho endelevu kwa changamoto za nishati na ajira kwa vijana.
Ikiwa mikakati itakayowekwa itatekelezwa kwa ushirikiano wa dhati, Afrika itaondokana na changamoto za nishati na kutoa fursa nzuri kwa watu wake kujiendeleza, kujifunza, na kupata ajira katika sekta muhimu za maendeleo.
Kwa hivyo, ni muhimu kuhakikisha kuwa kila hatua inatekelezwa kwa ufanisi na kwa haraka ili kufikia malengo haya. Mkutano huu ni hatua muhimu katika kufikia malengo hayo na kuleta mabadiliko chanya kwa bara la Afrika.
