China imetangaza tena Jumamosi, Aprili 26, kwamba haifanyi mazungumzo yoyote ya kibiashara na Marekani, ikikanusha kauli ya Rais wa Marekani Donald Trump siku moja kabla.
Imechapishwa:
Dakika 1
Matangazo ya kibiashara
“Hakujakuwa na mashauriano au mazungumzo kati ya China na Marekani kuhusu masuala ya ushuru, hata makubaliano bado,” Ubalozi wa China mjini Washington umesema katika taarifa iliyochapishwa kwenye huduma ya ujumbe wa WeChat. Madai ya Marekani kwamba mazungumzo kuhusu ushuru wa forodha yanaendelea ni “kupotosha,” diplomasia ya China inabainisha.
“Acha kutishia”
“Ikiwa Marekani inataka kweli kutatua suala hilo kwa njia ya mazungumzo, ni lazima kwanza kusahihisha makosa yake, kuacha vitisho na kushinikiza wengine, na kuondoa kabisa hatua zote za ushuru wa upande mmoja dhidi ya China,” imesema taarifa hiyo. Katika mahojiano yaliyochapishwa siku ya Ijumaa, Aprili 25, na Jarida la Time, Bw. Trump alithibitisha kuwa majadiliano yalikuwa yanaendelea kati ya nchi hizo mbili kujaribu kufikia makubaliano, na akapendekeza kuwa mchakato huo unaweza kukamilishwa katika wiki zijazo.
Pia amesema alizungumza kwa simu na mwenzake wa China Xi Jinping, bila kutaja tarehe au maudhui ya mazungumzo. “Alipiga simu. Na sidhani kama hiyo ni ishara ya udhaifu kwa upande wake,” mkuu wa nchi wa Marekani amesema. Wizara ya Biashara ya China ilikanusha siku ya Alhamisi kwamba ilifanya mazungumzo ya kiuchumi au kibiashara na Washington.
Rais wa Marekani ameamua kutoza ushuru wa 145% kwa baadhi ya bidhaa zinazoagizwa kutoka China. Kwa kulipiza kisasi, Beijing ilitoza 125% ya malipo ya ziada kwa bidhaa kutoka Marekani.
