Wizara ya mambo ya nje ya nchi hiyo imekanusha uvumi unaoenea kwenye mitandao ya kijamii kuwa rais Salva Kiir amefariki dunia.
Imechapishwa: Imehaririwa:
Dakika 1 Wakati wa kusoma
Matangazo ya kibiashara
Siku ya Alhamisi Wizara ya Mambo ya Nje na Ushirikiano wa Kimataifa ya Sudani Kusini imekanusha uvumi wa kifo cha Rais Salva Kiir.
Wakati uvumi ukienea mtandaoni kuhusu afya ya kiongozi huyo mwenye umri wa miaka 73, Wizara ya Mambo ya Nje imesema Bw. Kiir “yu hai, yuko vizuri na amejitolea kikamilifu kutumikia taifa.”
Serikali ya Sudani Kusini yalaani “habari mbaya za uwongo”
Wizara “inakanusha kwa uthabiti na kwa uhakika habari mbaya ya uwongo inayosambazwa kwenye mitandao ya kijamii kwamba Mheshimiwa Rais Salva Kiir Mayardit amefariki,” imesema katika taarifa iliyochapishwa kwenye mtandao wa kijamii wa Facebook.
Kulingana na taarifa ya wizara hiyo, Bw. Kiir “anaendelea kutekeleza majukumu yake ya urais kwa nguvu zote, kujitolea, afya njema na utimamu kamili.”
Wizara hiyo imeongeza kulaani kile ilichokiita “usambazaji wa kimakusudi wa taarifa za uongo zinazolenga kuleta hofu, mkanganyiko na ukosefu wa utulivu usio wa lazima.”
Siku ya Jumatano, uvumi ulianza kuenea kwenye mitandao ya kijamii kwamba Kiir amefariki. Mwanasiasa mmoja wa Kenya hata aliandika kwenye jukwaa la X kwamba alisikia kwamba Kiir “ameaga dunia.”
“Hizi ni tetesi zisizo na msingi kabisa na zisizowajibika, zilizobuniwa na maadui wa amani, maendeleo, ujenzi wa taifa na utulivu nchini Sudani Kusini,” Wizara ya Mambo ya Nje ilisema.
Ukosefu wa usalama Sudani Kusini
Madai hayo yamekuja huku Sudani Kusini ikikabiliwa na kipindi cha ukosefu wa usalama, huku mapigano kati ya vikosi vinavyoshirikiana na Kiir na Makamu wa Rais Riek Machar yakizuka katika maeneo kadhaa ya nchi hiyo.
Umoja wa Mataifa umeonya kuwa nchi hiyo iko ukingoni mwa vita vingine vya wenyewe kwa wenyewe.
Mkataba wa amani ulitiwa saini mwaka 2018, na kumaliza miaka mitano ya mzozo uliosababisha vifo vya watu 400,000.
Makubaliano haya yalisababisha mfumo wa kugawana madaraka ambapo Machar alikuwa mmoja wa makamu watano wa rais wanaofanya kazi pamoja na Rais Salva Kiir katika serikali ya umoja.
