Marekani na China zinatarajiwa kutangaza maelezo ya “hatua zilizofikiwa” ambazo zinasema ziliyafanya mwishoni mwa juma hili lililopita wakati wa mazungumzo mjini Geneva yaliyolenga kupunguza mvutano kuhusu suala hilo gumu la ushuru wa forodha.
Imechapishwa:
Dakika 2
Matangazo ya kibiashara
Mataifa makubwa mawili yenye uchumi mkubwa duniani, ambayo yamejihusisha katika mzozo wa kibiashara tangu Donald Trump atoze ushuru wa forodha, zinatarajiwa kutoa tamko la pamoja baadaye leo.
Siku ya Jumapili Waziri wa Fedha wa Marekani Scott Bessent alisema kwamba mazungumzo hayo yamepiga “hatua kubwa” katika taarifa fupi kwa waandishi wa habari baada ya mkutano wa siku mbili na Makamu Waziri Mkuu wa China He Lifeng.
He Lifeng amethibitisha hilo saa chache baadaye, akizungumza na waandishi wa habari kuhusu “maendeleo makubwa” baada ya siku mbili za majadiliano ambayo alielezea kuwa “ya wazi, ya kina na makubwa.”
Beijing na Washington zimekubali kuanzisha “utaratibu wa mashauriano” kuhusu biashara, amebainisha He Lifeng. Naibu Waziri wa Biashara wa China Li Chenggang amesema utaratibu huo utawezesha “mazungumzo ya mara kwa mara na yasiyo ya kawaida kuhusu masuala ya biashara.”
“Inatia moyo sana”
Katika taarifa yake, Ikulu ya Marekani imekaribisha kile ilichokiita “makubaliano mapya ya kibiashara” na China, bila kutoa maelezo zaidi.
Mkutano wa Geneva ulikuwa mkutano wa kwanza wa ana kwa ana kati ya maafisa wakuu kutoka nchi zote mbili tangu Bw. Trump atoze ushuru wa 145% kwa bidhaa kutoka China mapema mwezi Aprili, juu ya ushuru uliopo.
Beijing, ambayo imeahidi kupambana na malipo haya ya ziada “hadi mwisho,” imelipiza kisasi kwa ushuru wa 125% kwa bidhaa za Marekani.
Vita vya kibiashara vimetikisa soko la fedha duniani na kuchochea hofu ya mfumuko wa bei nchini Marekani na kuzorota kwa uchumi.
Wawekezaji wamekaribisha matangazo haya kwa matumaini ya tahadhari, bila furaha. Masoko ya hisa ya Asia kwa ujumla yaliongezeka saa sita mchana (+0.9% Hong Kong, +0.4% Shanghai, +0.5% Seoul, +0.7% nchini Singapore), isipokuwa Tokyo (-0.1%).
“Majadiliano haya yanaashiria hatua muhimu mbele na, tunatumai, yataashiria vyema siku zijazo,” Mkurugenzi Mkuu wa Shirika la Biashara Duniani (WTO) Ngozi Okonjo-Iweala amesema, baada ya kukutana na He Lifeng. “Maendeleo haya ni muhimu sio tu kwa Marekani na China, lakini pia kwa ulimwengu wote, haswa nchi zilizo hatarini zaidi kiuchumi.”
